تحریک جہاد اسلامی فلسطین

تحریک جہاد اسلامی فلسطین
پارٹی کا نام	تحریک جہاد اسلامی فلسطین
بانی پارٹی	فتحی شقاقی عبدالعزیز عوده
پارٹی رہنما	زیاد نخاله
مقاصد و مبانی	اسرائیل کی تباہی اسرائیل کے بغیر فلسطین کی آزاد ریاست کا قیام

تحریک جہاد اسلامی فلسطین (عربی: حركة الجهاد الإسلامي في فلسطين) ایک فلسطینی اسلام پسند تنظیم ہے جس کا قیام سنہ 1981ء اخوان المسلمین کی ایک شاخ کے طور پر ہوا تھا۔ نظریاتی طور یہ تنظیم اسلامی جمهوری ایران سے متاثر ہے۔ تحریک جہاد اسلامی فلسطینی افواج کے اتحاد کا رکن ہے جو معاہدہ اوسلو کو مسترد کرتا ہے اور جس کا مقصد ایک خودمختار اسلامی فلسطینی ریاست کا قیام ہے۔ جہاد اسلامی اسرائیل کی فوجی تباہی کا مطالبہ کرتا ہے اور دو ریاستی حل کو مسترد کرتا ہے ۔

تاریخ اور پس منظر

جہاد اسلامی کو 1981 میں دو فلسطینی کارکنوں نے غزہ میں باضابطہ طور پر قائم کیا تھا ایک ڈاکٹر فتحی شقاقی ، ر فح میں مقیم طبیب، اور دوسرے شیخ عبدالعزیزعودہ ، جبلیہ پناہ گزین کیمپ کے اسلامی مبلغ۔

مصر میں مقیم، شقاقی اور عودہ اصل میں اخوان المسلمون کے رکن تھے۔ اسرائیل کی تباہی کے بارے میں ان کے خیالات نے انہیں 1979 میں جہاد اسلامی مصر کی ایک شاخ جہاد اسلامی -شقاقی گروپ قائم کرنے پر مجبور کیا اور انہوں نے مصر سے باہر آپریشن شروع کیا ۔

خالد اسلامبولی کے ہاتھوں مصر کے صدر انور سادات کے قتل کے بعد 1981 میں شقاقی گروپ کو مصر سے نکال دیا گیا تھا ۔ شقاقی اور عودہ غزہ واپس آئے جہاں انہوں نے باضابطہ طور پر جہاد اسلامی فلسطین قائم کیا اور وہاں سے انہوں نے اپنا کام آگے بڑھایا۔

تنظیم کا مقصد 1948 سے پہلے کے دستوری (mandatory) فلسطین کی جغرافیائی سرحدوں کے اندر ایک خودمختار، اسلامی فلسطینی ریاست کا قیام تھا. اس تحریک نے 1984 میں اسرائیل کے خلاف اپنی مسلح کارروائیوں کا آغاز کیا۔ 1988 میں، اس کے رہنماؤں کو اسرائیل نے لبنان جلاوطن کر دیا ۔ لبنان میں رہتے ہوئے، اس گروپ نے حزب اللہ اور ایران میں اس کے حامیوں سے ٹریننگ اور حمایت حاصل کی، اور حزب اللہ کے ساتھ قریبی تعلقات استوار کر لیے۔ 1990 میں،اس کا ہیڈکوارٹر شام کے دارالحکومت دمشق منتقل ہو گیا ، جہاں یہ بدستور قائم ہے، جس کے دفاتر بیروت ، تہران اور خرطوم میں واقع ہیں۔

لیڈروں کا قتل اور اذیت

جہاد اسلامی تحریک کے قائدین اور کمانڈروں کو ہمیشہ امریکہ اور اسرائیل نے ستایا اور قتل کیا ہے۔ تحریک جہاد اسلامی فلسطین کے بانی کو صیہونی حکومت نے 1995 میں قتل کر دیا تھا۔ اسی دوران اس تحریک کے 40 ارکان کو حماس کے 370 ارکان کے ساتھ 1992 میں لبنان کے گاؤں مرج الزہور میں جلاوطن کر دیا گیا۔

نظریہ، مقاصد اور عقائد

رمضان عبدالله محمد شلح

15 دسمبر 2009 کو شام کے دار الحکومت دمشق میں ورلڈ فیڈریشن کے ایک وفد نے رمضان شلح کا انٹرویو کیا تھا۔ انٹرویو میں اس کا کہنا تھا کہ اسرائیلی نہ تو دو ریاستی حل کو قبول کریں گے اور نہ ہی ایک ریاستی حل کو ۔ واحد انتخاب اسرائیل کی شکست تک مسلح جدوجہد کو جاری رکھنا ہے۔

ہم اس سرزمین کے مقامی لوگ ہیں۔ میں غزہ میں پیدا ہوا۔ میرا خاندان، بھائی اور بہنیں غزہ میں رہتے ہیں۔ لیکن مجھے ان سے ملنے کی اجازت نہیں ہے۔ لیکن کسی بھی امریکی یا سائبیرین یہودی کو ہماری زمین لینے کی اجازت ہے۔ دو ریاستی حل کا آج کوئی امکان نہیں اور وہ نظریہ مر چکا ہے۔ اور ایک ریاستی حل کا کوئی بھی کوئی حقیقی امکان نظر نہیں آتا۔

میں کبھی بھی، کسی بھی حالت میں، اسرائیل کی ریاست کے وجود کو قبول نہیں کروں گا۔ مجھے یہودیوں کے ساتھ رہنے میں کوئی پریشانی نہیں ہے ہم صدیوں سے امن کے ساتھ رہتے آئے ہیں۔ اور اگر نیتن یاہو سے پوچھا جائے کہ کیا ہم ایک ریاست میں اکٹھے رہ سکتے ہیں، تو میں ان سے کہوں گا: "اگر ہمیں پورے فلسطین میں آنے جانے کا یہودیوں کے برابر حق حاصل ہو، اگر خالد مشعل اور رمضان شلح جب جہاں چاہیں آ جائیں اور حیفہ کا دورہ کریں، اور اگر وہ چاہیں تو ہرزلیہ میں ایک گھر خریدیں، تب ہمارے پاس ایک نئی زبان ہو سکتی ہے، اور بات چیت ممکن ہے۔

یہ ایک سنی جہادی تحریک ہے تاہم اس میں دوسرے مذہبی عقائد بھی شامل ہیں

تحریک کے اہداف

جہاد اسلامی فلسطین میں مندرجہ ذیل مقاصد کے حصول کے لیے کوشاں ہے:

• پورے فلسطین کو آزاد کرانا، صیہونی وجود کو ختم کرنا، اور سرزمین فلسطین پر اسلامی حکومت قائم کرنا، جو انصاف ، آزادی، مساوات اور مشاورت کے حصول کی ضمانت دیتا ہے ۔
• فلسطینی عوام کو متحرک کرنا اور تمام ممکنہ تعلیمی،تربیتی اور تنظیمی وسائل کا استعمال کرتے ہوئے انہیں جہادی،عسکری اور سیاسی طور پر تیار کرنا تاکہ وہ فلسطین کے سلسلے میں اپنے جہادی فریضے کو ادا کرنے کے قابل بن سکیں .
• ہر جگہ ملت اسلامیہ کے عوام کو بیدار اور متحرک کرنا اور صیہونیوں کے ساتھ فیصلہ کن جنگ لڑنے کے لیے اپنا تاریخی کردار ادا کرنے کی ترغیب دلانا ۔
• فلسطین کے لیے پرعزم اسلامی کوششوں کو متحد کرنے کے لیے کام کرنا ، اور دنیا کے تمام حصوں میں اسلامی اور آزادی کی ہم فکر تحریکوں کے ساتھ تعلقات کو مضبوط بنانا۔
• اسلامی عقیدہ ، شریعت اور اخلاق کی طرف دعوت دینا، اسلام کی پاکیزہ اور جامع تعلیمات کو مختلف قوموں کے لوگوں تک پہنچانا، اورامت اور انسانیت کے لئے اسلام کے تہذیبی پیغام کااحیا کرنا۔

تحریک اپنے مقاصد کے حصول کے لیے مندرج ذیل ذرائع اختیار کرتی ہے:

• صہیونی دشمن کے مقاصد اور مفادات کے خلاف مسلح جہاد کی کوشش کرنا ۔
• عوام کو آمادہ اور منظم کرنا، انہیں تحریک کی صفوں کی طرف راغب کرنا اور قرآن و سنت اور صالح قومی روایات سے ماخوذ نصاب کے مطابق انہیں جامع طور پر اہل بنانا۔
• صہیونی وجود کے خلاف جہاد کی حمایت اور عالمی صہیونی اثر و رسوخ کا مقابلہ کرنے کے لیے دنیا کی اسلامی اور عوامی تحریکوں اور تنظیموں اور حریت پسند قوتوں کے ساتھ رابطے اور تعاون کے اسباب فراہم کرنا۔
• تحریک کے مقاصد کو حاصل کرنے کے لیے تمام تعلیمی، تنظیمی، ثقافتی، سماجی، اقتصادی، میڈیا، سیاسی اور عسکری ذرائع اختیار کرنا جو شرعی اعتبار سے جائز ہوں اور تجربے کے اعتبار سے پختہ ۔
• رائے عامہ کو متاثر کرنے اور پیغام پہنچانے کے لئے معروف اور ابھرتے ہوئے ذرائع ارتباط میں سے سبھی دستیاب اور مناسب ذرائع کا استعمال کرنا
• تحریک کے سبھی ادارے اور تنظیمیں تحریک کے استحکام اور پیشرفت کو یقینی بنانے کے لیے مطالعہ، منصوبہ بندی، پروگرامنگ، تشخیص اور نگرانی کے طریقے اپناتی ہیں۔

سرگرمیاں

جہاد اسلامی فلسطین نے گزشتہ برسوں میں کئی عسکری سرگرمیوں کی ذمہ داری قبول کی ہے اور اسرائیل کے خلاف 30 سے ​​زائد بم دھماکوں کی ذمہ داری قبول کی ہے۔

سماجی خدمات

جہاد اسلامی ، فلسطینی علاقوں میں درجنوں مذہبی تنظیموں کو بھی کنٹرول کرتی ہے جو این جی اوز کے طور پر رجسٹرڈ ہیں اور مساجد ، اسکول اور طبی سہولیات چلاتی ہیں جو مفت خدمات پیش کرتی ہیں.

عوامی حمایت

واشنگٹن انسٹی ٹیوٹ فار نیئر ایسٹ پالیسی کے ذریعہ جون 2015 کے ایک رائے عامہ کے سروے میں پتا چلا ہے کہ اسلامی جہاد کو مغربی کنارے کے 71% فلسطینیوں اور غزہ میں 84% فلسطینیوں نے پسند کیا ہے .